Тапсырма. Әңгіме туралы түсінгеніңді айт. Дәптеріңе постер жаса. Әңгіме – болған оқиғаны баяндайтын қысқа көлемді прозалық жанр. Әңгіменің тақырыбы, идеясы, сюжеті, құрылымы болады.
Әңгіменің тақырыбы – автордың айтқысы келетін ойдың бағыты.
Әңгіменің идеясы – автордың оқырманға жеткізгісі келетін ойы.
Әңгіменің сюжеті – оқиға желісінің жүйелі берілуі.
Егер сен әңгіме құрастыратын болсаң, онда оның сюжеті төмендегідей құрылым бойынша жүзеге асуы қажет:
Сюжеттің басталуы – оқиға неден, қалай басталғандығы туралы жазу.
Сюжеттің байланысы – оқиғаға қатысқан кейіпкерлермен таныстыру.
Сюжеттің дамуы – кейіпкерлердің іс-әрекеттері туралы баяндау.
Сюжеттің шарықтау шегі – кейіпкерлердің іс-әрекеттері арқылы болатын оқиғаның негізгі тұсын көрсету.
Сюжеттің шешімі – оқиғаның шешімін көрсету, аяқтау.
Әңгіменің құрылымы – ойды жүйелі, түсінікті, мазмұнды жеткізу үшін қажет. Егер құрылым сақталмаса, мазмұн да жоғалады. Әңгіменің құрылымына кіріспе бөлім, негізгі бөлім, қорытынды бөлім жатады.
Сонымен қатар әңгіменің идеясын ашатын сөздер болады. Ол сөздерді – тірек сөздер дейді.Сюжетті суреттер мен тірек сөздер әңгіменің одан әрі қызықты болуына көмек болады.