Атамекен деп кеудемді кере демалғанда жүрегім мақтаныш сезіміне толады. Қазақстанның кең даласындай байтақ дала, бір шетінен екінші шетіне дейін құс қанаты талатын ұлан-ғайыр кең өлке еш жарде де жоқ шығар. Еліміздің байлығы өте көп және қазынаға бай. Табиғаты сұлу, биік-биік асқар тау, мөп-мөлдір көлдері, неше түрлі өсімдіктері бар, жері шұрайлы, шөбі шүйгін елімнің.
Осы еліміз, атамекеніміз-Қазақстан жылдан жылға өсіп-өркендеп келеді. Бұл жерді сақтап қалуда қаншама зиялы қауымдар, батырлар мен билеріміз, намысшыл азаматтарымыз терін төгіп, жанын қиды. Тарихта қалған белгілі оқиғалар жоңғар, қалмақ шапқыншылықтарынан, Ұлы Отан соғысында жаудан қорғаған батырларымыз, айтулы желтоқсан оқиғасында мемлекетіміздің намысы үшін жанын қиған патриоттарымызды халқымыз ән-жырына қосып, аяулы аттарын ардақтайды.
Мейлі қанша қан кешсін, мейлі азап шексін, әйтеуір, ер қазақ халқым біздерге өзінің жас ұрпақтарына егемендік сыйлады. Егемендікке қол жетіп, Қазақстанымыздың көк байрағы желбіреді. Бүгін біз егеменді, тәуелсіз ел деп-отанымыздың иелі, ана тіліміздің киелі болып, ата тарихымыздың жүйелі болуын айтамыз.
Осы уақыт ішінде біздің ел қайта өрледі, шарықтады, жұлдыздай жарқырап көптеген жетістіктерге жетті. Біздің елде басқа да өркениетті елдерде сияқты кейінгі ұрпақтың мағыналы өмір сүруіне үлкен мүмкіндік бар. Еліміздің бүгінгі тамаша өмірін мақтан ете отырып, сан-саналы өміріміздің нәрі халқымыздың ынтымағында, бірлігінде , бейбіт өмірінде деп ойлаймын.
Мұның бәрі-Елбасының елеулі еңбегі. Елбасының арқасында бүгінгі Қазақстан –еңселі Қазақстан, мәртебесі биік шоқтығы да биік ел! Өйткені оның Елбасы-рухы биік, жасампаз, кімді болса да өз ісіне сендіре алатын, кімді болса да ізгі істерге жігерлендіре алатын тарихи тұлға, халықтың қалаулы перзенті. Бүгінгі күні Тәуелсіз Қазақстанды Мәңгілік Ел ету бағытындағы тарихи аса құнды идеясын жария етіп, ата-бабаларымыздың сан ғасырлар бойы аңсаған арманын іске асырудың маңыздылығын ашып көрсетті. Өткен тарихымыздың көзімен қарасақ, біздің жыл санауымыздан бұрын Күлтегін заманында Ғұн билеушісі Мөде патша «Енді біз төрткүл дүние танитын Мәңгілік Ел болдық» деген екен. Кейін Ұлытауда осы ұран тағы қайталанды. Үш жүздің көсемдері, билері бас қосқанда ұлы жиында «бір мақсат, бір мүдде, бір болашақ» деп тасқа қашап жазған сөздер бар. Олай болса, осы мақсатты Елбасы қайта тірілтті. «Біз үшін болашағымызға бағдар ететін, ұлтты ұйыстыра ұлы мақсаттарға жетелейтін идея бар. Ол- Мәңгілік Ел идеясы»-деп атап көрсетті. Мәңгілік ел болуды ата-бабаларымыз сонау Орхон-Енисей жазулары пайда болған кезден бастап аңсаған. Бәріміз білетін Білге Қағанның кеңесшісі Тоны Көк 680-745 жылдар шамасында Түрік елін Мәңгілік Ел ету үшін өлместей бағдарлама жасаған. Бұл тарихымызда бар шындық. Алдымен елідің шекарасын бекіт, көршілермен тату бол дегенді де сонда жазып кеткен...
«Мәңгілк Ел» мұратына жету жас ұрпақтардың, біздің бірлігіміз бен сабақтастығымыздың көрінісі арқылы жүзеге асады. Қазақ елі талай замандарды бастан өткерді, сүрінді, бірақ белді бекем буып, қайтадан бой тікті, осы қайсар мінезіміздің арқасында іргесі бекем, бірлігі жарасқан, халқы тату-тәтті өмір сүріп жатқан әрі келешегі кемел мемлекетке айналдық. Қаншама ғасыр өтсе де ата-бабаларымыздың басты арманы орындалды. Олардың ұрпақтары біз Тәуелсіздіктің көк туы астында аңсаған егемендік, тәуелсіздік, тұтастық, бірлік, азаматтық құндылықтар «байлығымыз да бақытымыз да болған Мәңгілік Тәуелсіздігімізді көздің қарашығындай сақтауымыз керек»- деп ойлаймын.
Мәңгілік сөзі бабалардан мирас болып келе жатқан мәңгі өлмейтін асыл қазынамыздың бірі- ана тіліміз. Олай болса, Мәңгілік елдің онымен қатар жасап, бірге дамитын мәңгілік тілі болуы да шарт. Ол мемлекеттік тілі-қазақ тілі. Халықтың жаны да ана тілінде. Ана тіліміз- рухани тірегіміз де.
Бір мақсат, бір мүдде, бір болашақ жолында Елбасының айналасына бірігу «Мәңгілі ел» мұратымызға жетудің берік негізі болып табылады деймін.
Объяснение:
Бақытты отбасы дегенде көпшілігіміздің көз алдымызға қайратты әке, мейірімді ана, жадыраған балалар келеді. Шынында да солай. Отбасының бақыты үшін көп нәрсенің қажеті жоқ. Жанұя мүшелерінің сыйластығы, махаббаты, бір-біріне деген құрметі мен сүйіспеншілігі болса жетіп жатыр.
А өмірді отбасы арқылы тани бастайды, яғни ең маңызды базалық танымды отбасынан алады. Ата-анасы, бауырлары баланың өмірінде үлкен рөл атқарады. «Ұяда не көрсе, ұшқанда соны іледі,» – деп бекер айтылмаса керек. Отбасы – баланың эмоционалды, рухани құндылықтарды бойына сіңіретін ортасы. Ата-анасы балаға тәлім-тәрбие береді, жақсы мен жаманды, адамдармен қарым-қатынас жасауды үйретеді. Басқа сөзбен айтқанда, отбасы – үлкен өмірге дайындайтын мектеп. Ал сапалы «білімді» қайдан, қандай ортадан алуға болады? Әрине, өзара гармонияда, бақытты ортада өмір сүретін, сол бақытты жасай алатын адамдардан алады. Осындай бірлігі жарасқан отбасынан шыққан адам ғана өзінің отбасын бақытты ете алады, өмірде жолы болатын тұлға ретінде қалыптасады.
Менің де отбасым ең бақытты жанұя деп ойлаймын. Қасымда қорған болар әкешім, әлемдегі ең мейірімді жан – анашым бар. Кез келген уақытта қысылмай көмек сұрай алатын, мен дегенде жаны бөлек бауырларымның ортасындамын. Таңертең анам бетімнен сүйіп оятады, сабақтан қайтқанда да солай. Кейде туған үйімнің жылуы анашымның ыстық құшағында шығар деп ойлаймын. Ал әкем – үйіміздің тірегі, біздің сапалы білім алуымыз үшін, көйлегіміздің көк, қарнымыздың тоқ болуы үшін аянбай еңбек етіп жүрген жан. Жұмыстан келгесін бізбен бірге ойнап, кейде сабағымызға көмектеседі. Үнемі бар білгенін айтып, ақылын-кеңесін аяған емес. Бауырларыммен сабақ дайындаймыз, ойнаймыз. Кейде ренжісіп қалатынымыз да бар. Сонда да оларды қатты жақсы көремін. Бәріміз бір дастархан басында жиналып, шұрқырап әңгімелескенде, ерекше бір тәтті сезімге бөленемін. Ең қымбат сәттер екенін жан жүрегіммен сезінемін. Ал демалыс күндері уақытымызды бірге қызықты етіп өткізуге тырысамыз. Табиғатқа шығамыз не болмаса кино не мультфильм көреміз. Үйде болғанның өзінде неше түрлі ойындар ойнап, анамның дәмді-дәмді тамақтарын жейміз. Жалпы анамның ыстық тамағының иісі үйіміздің берекесін, молшылығын білдіретін негізгі белгі деп білемін. Шаршағанда, сабақтан келгенде қандай рахат: қарнымыз тойып мәз-мейрам боп қаламыз. Анамыз біздің қуанышымызды көріп екі есе бақытқа бөленеді.
Әке-шешем әрдайым бізді жақсылыққа, ешкімнің ала жібін аттамауға, адалдық пен мейірбандылыққа, жанашырлыққа тәрбиелеп қана қоймай, өздері да үлгі бола біледі. Ес білгелі ата-анам жайында өзгелерден жаман сөз естімедім. Олардың біреуге арамдық жасап, біреумен ұрсысып жатқанын не болмаса басқалар туралы жаман сөз сөйлегенін естімедім. Мен де өз кезегімде жақсы адам болуға тырысып келемін. Ата-анамның үмітін ақтау – өмірдегі ең үлкен арманым.
Менің танымымда бақытты отбасы – бірін-бірі риясыз жақсы көретін, еш есепсіз жақсылық жасауға асығып тұратын, тілеуіңді шын тілейтін адамдарың. Сонымен қоса олар тек жақсылықта ғана бірге болмайды, қиыншылықты да бірге өткереді, алға басуға жігер береді. Қандай жағдай болмасын жаныңнан табылады, қолдауға дайын тұрады. Алла Тағала ол адамдарды сенің өміріңнің бірінші күнінен-ақ байланыстырып қояды және ол байланысты соңғы күніңе дейін берік ұстауың керек. Үлкен бақыт – қандай жағдай болмасын сені жақсы көретін, бар кемшілігіңмен қабылдай алатын адамдардың барына сенімді болу шығар. Ал ондай адамдар – әрқашан сенің үйіңде: ата-анаң мен бауырларың. Жалпы, өмірде бақытты адам бақытты отбасынан шығады.
