Помнік Максіму Багдановічу ўсталяваны ў скверы перад тэатрам оперы і балета, недалёка ад месца, дзе нарадзіўся і жыў паэт. Ён адкрыты дванаццатага снежня тысяча дзевяцьсот восемдзесят першага году ў дзень дзевяностагоддзя ад дня нараджэння Багдановіча.
Бронзавая статуя паэта вышынёй больш за чатыры з паловай метры ўсталяваная на вузкім, каля паўметра, пастаменце з чырвонага граніту. Паэт адлюстраваны са скрыжаванымі на грудзях рукамі. У правай руцэ букет васількоў - кветак, апетых у яго паэзіі. У ракурсе фігуры, задуменным, скіраваным поглядзе выражаны душэўны парыў, сыноўняя любоў да роднай беларускай зямлі. Помнік удала звязаны з навакольным ландшафтам, арганічна ўвайшоў у ансамбль вуліцы Янкі Купалы, на якую ён арыентаваны.
